المساعد الشخصي الرقمي

مشاهدة النسخة كاملة : بحبـــك يا مصـــر


شمس
11-26-2015, 06:56 AM
بَحِبِّكْ يامصرْ
بَحِبِّكْ يا مصرْ ..
وبعشقْ ترابكْ .
وألِفْ المداينْ ..
وأرْجعْ لبابِكْ .
وأحِسْ بكيانى ..
وكرامتى فْ رحابِكْ .
يقولوا فقيره ..
يقولوا أسيره ..
بشوفِكْ أميره ..

وأحبِّكْ يا مصرْ .
بحبِّكْ ملايه .. ومنديلْ بِقُويا .
مقالبْ من أختى .. وغتَاته مْنْ أخويا .
ودعوه مِنْ أمى .. تنسينى همِّى ..
وحِكْمَه مْنْ أبويا.
وأحبِّكْ صبيِّه .. على البحرْ جايَّه ..
فى ساعةْ عصَارى .
ونسمه قُبَالْها .. تطيَّرْ فى شالْها ..
تبَيِّنْ جمالها .. وتِرجعْ تدارى .
وأحبِّكْ مراكبْ .. تعدِّى إللِّى راكبْ ..
لبرْ الأمانْ .
يدوبْ جوَّا نيلكْ .. ويعطشْ يجيلكْ ..
يقوللِّكْ كمانْ .

وأقابلِكْ ببُوسه .. فى زفِّةْ عروسه ..
ولَمَّه فى بيتنا ..
مع ولادْ حارتْنا ..
تدُقْ المزاهرْ .. ترُدْ المزامرْ ..
تزَغْردْ جارتْنا .
نهلِّلْ .. نغنى ..
وحلمْ التمنِّى ..
ينورْ ليليتنا .
وأحبِّك زياره لبيتْ عمْ سيدْ ..
ده أصله فقير مِشْ حيقْدرْ يعَيِّدْ ..

نعَيِّدْ عليه .. نفرَّحْ عنِيهْ ..
ويدعيلْنا دعوه بمليونْ جنيه .
فى أرضِكْ يحِسْ الغريبْ إنُّه مصرى ..
وإحنا الأجانبْ .
ويلْقَى الرعايهْ .. ويلْقَى الحمايهْ ..
على كلْ جانبْ .
ويمشى ف ربوعِكْ .. ويشبعْ بجوعِكْ ..
ويعملْ مصايبْ .
ويرحلْ وينسى .. جِميلِكْ ويقْسَى ..
ويطْلَعْ يعايبْ .
ويرْجعْ تسامْحى .. يا ساكنه فْ ملامحى ..

يا سِتْ الحبايبْ .

ولادِكْ بَنُوكى .. بروحْهُمْ فَدُوكى ..
ويِشْهدْ عليهمْ ترابكْ فى سينا .
ومنهُمْ با عوكى .. عشانْ الشِيروكِى ..
وفيلا فْي مارينا .
يعيشوا فى خيرِكْ .. ويدُّوهْ لغيركْ ..
ولادْ اللَّذِينا .
ولوْ جارْ زمانْهمْ .. يعودُوا لْمكانهمْ ..
يلاقوا السَكينَهْ .
وتِنْسِى جحودْهمْ .. وتبكى عليهمْ ..
عنيكى الحزينهْ .

فى أرضكْ سرَحْتْ .. فشَلْتْ ونَجَحْتْ ..
وعشْتْ بْبساطَهْ .
صاحِبتْ الحمَامْ .. ونِمْتْ فْ سلامْ ..
ولوَْ عَ البلاطهْ .
تِغَيَّرْ فى شَكلى ..همومى ومشَاكْلى ..
لكِنْ روحى لأْ .
أعَبَّرْ بغنْوهْ .. وأقولْ نُكتهْ حلوهْ ..
لكِنْ يأسْ لأْ .
ما طيقْشْ الغَتاتهْ ..
وقلبى المسالمْ ما يعرفْ شّماتهْ ..
وأقولْ بالتلاتهْ ..
بحبِّكْ .. بحبِّكْ .. بحبِّكْ .. يا مصرْ

jackson
11-26-2015, 07:09 AM
بزمتك في ايه في مصر يتحب :] :cry:

شمس
11-30-2015, 06:36 AM
بحب مصر طبعا عشان حاجات كتيرة جدا جدا جدا
كفاية اني بحبها لانها ارضي
وبعدين كفاية انت فيها........ بقي انت تبقي فيها ومحبهاش

ههههههههه


بحب مصر لانى مصريه لان كل حاجه حلوه حصلتلى كانت على ارضها وكل صحابى وقاريبى ساكنين فى حضنها وامى وابويا واخواتى عايشين فى قلبها

هتقول انك بتتعب فى
المواصلات اللى بنتعب فيها كل يوم الصبح
علشان العيش اللي بالخناق
علشان التعليم على شان المرتبات
علشان .......علشان......علشان.......
لكن الحمد لله


مهما كنا مش عاجبنا الحال فى مصر ده ميقللش فى حبنا لمصر لان مصر هى الارض ومش من حقها علينا اننا نحاسبها على حاجات هى ملهاش ذنب فيها

بالعقل لو انا مش بحب مصر احب ايه قولى والله لا كلام اغانى ولا شعارات انا مصرىة بعشق مصر مهما حدث لى فيها